Rubavu:Inkuru y’urupfu rw’abana babiri baguye mu cyobo cy’amazi bahasiga ubuzima

Mu karere ka Rubavu mu murenge wa Nyamyumba haravugwa inkuru y’urupfu rw’abana babiri baguye mu cyobo cy’amazi bakahasiga ubuzima.

Byabaye ahagana saa tatu za mu gitondo, ubwo abo bana Irakoze Aline wari ufite umwaka umwe n’amezi atanu na Manzi Clever wari ufite umwaka umwe n’amezi atatu, babasanze bapfiriye mu cyobo cya metero ebyiri kirimo amazi, giherereye kwa sekuru w’abana bombi, bapfuye.

Imirambo y’aba bana yabonywe na nyirakuru ahita atabaza, babakuramo bose bashizemo umwuka.

Umunyamabanga Nshingwabikorwa w’Akagari ka Burushya, Uwimana Eustache, yemeje aya makuru y’akababaro, avuga ko ari impanuka yabayeho.

Ati “Abana barimo bakinira mu rusisiro hamwe n’abandi bana, barimo koga mu mazi y’ikidengazi bavuga ngo ni Ikivu, nyuma baragenda batandukana n’abandi bana. Nyuma birasa nk’aho babonye icyo cyobo cyarimo amazi bagira ngo kireshya na cyakindi bakajyamo, kandi cyo cyari kirekire kuko cyapimaga metero ebyiri z’ubujyakuzimu.”

Yakomeje avuga ko nyirakuru w’abo bana yazengurutse mu rusisiro abashakisha arababura, nyuma nibwo yabonye umwana umwe arimo kureremba hejuru y’amazi, aratabaza babakuramo bombi bashizemo umwuka.

Asaba ababyeyi kuba hafi y’abana bakabigira nk’ihame, bakabitaho cyane ndetse buri muturage akaba ijisho rya mugenzi we, agafata umwana wese nk’uwe.

Hagenimana Thierry




Leave a Reply

Your email address will not be published. Required fields are marked *