John Pombe Magufuli na Pierre Nkurunziza ntibitabiriye inama yahuje abakuru b’ibihugu(EAC)mu kurwanya coronavirus n’ingaruka zayo

Umuryango w’ibihugu bya Afurika y’iburasirazuba (EAC) watangaje ko abakuru b’ibihugu bigize uyu muryango uyu munsi bakoze inama bifashishije ikoranabuhanga rya ‘video conference’, yo kwiga ku kurwanya coronavirus n’ingaruka zayo.

Kagame ayoboye inama ya EAC

Iyo nama yayobwe na Perezida Paul Kagame 

Mu bihugu bigize aka karere kugeza ubu hamaze kuboneka abantu 1,798 banduye coronavirus yavuzwe bwa mbere mu karere muri Kenya tariki 12/03/2020.

Iyi nama yari iyobowe na Perezida Paul Kagame w’u Rwanda uyoboye uyu muryango, yitabiriwe kandi na Uhuru Kenyatta wa Kenya, Yoweri Museveni wa Uganda na Salva Kiir wa Sudani y’Epfo.

EAC ntabwo yatangaje impamvu John Pombe Magufuli wa Tanzania na Pierre Nkurunziza w’u Burundi batayitabiriye.

Aba bategetsi bitabiriye inama bemeranyijwe gusangira amakuru y’ibiva mu bipimo bya Covid-19 hagati ya za minisiteri zishinzwe ubuzima, ubucuruzi, ubwikorezi, n’ibikorwa bireba uyu muryango.

Itangazo ryasohowe n’uyu muryango rivuga ko bemeranyijwe kandi “gukomeza gukurikirana abatwara amakamyo n’abakorana nabo no guhana amakuru yabo”.

Abatwara amakamyo yambukiranya imipaka muri iyi minsi bagaragajwe na bimwe mu bihugu bigize EAC nk’abakwirakwiza iki cyorezo mu ngendo bakora bajya cyangwa bava ku byambu bya Mombasa na Dar es Salaam.

Aba bategetsi mu nama yabo bategetse inzego z’ubuzima “gutegura uburyo buhuriweho n’akarere bwo gusuzuma no kwemeza ko abatwara amakamyo ari bazima mbere yo guhaguruka kandi bagasuzumwa buri byumweru bibiri, bagaha raporo abakuru b’ibihugu”.

Iyi nama yabo yabonye ko ibikorwa by’ubuhinzi, ubucuruzi, inganda, ubukerarugendo, kwakira abantu n’imyidagaduro biri kuzahazwa n’iki cyorezo.

Biyemeza ko ibihugu bigiye gufatanya korohereza ibikorwa bitandukanye muri izi nzego, nk’ubuhinzi, mu gutunganya no kugeza umusaruro wazo ku masoko y’akarere.

Banzuye kandi kugira ibyihutirwa; gukora ibikoresho byakorerwa mu karere byo kurwanya coronavirus nk’udupfukamunwa, ‘sanitizers’, amasabune, ibiribwa bitunganyije, ‘ventilators’ n’ibindi no koroshya ko bigezwa ku masoko y’akarere.

Abanduye coronavirus mu bihugu byo muri EAC kugeza ubu:

  • Kenya – 700
  • Tanzania – 509
  • Rwanda – 285
  • Sudani y’Epfo – 156
  • Uganda – 121
  • Burundi – 27

Hagenimana Thierry

Bana natwe tugususurutse umenye




Leave a Reply

Your email address will not be published. Required fields are marked *