Gisagara:Abantu 64 bafashwe batubahiriza amabwiriza yo kwirinda Covid-19

Mu ijoro ryo kuri uyu wa Gatandatu tariki 29 Kanama 2020, mu Karere ka Gisagara hafashwe abantu 64 barenze ku mabwiriza yo kwirinda ikwirakwira ry’icyorezo cya COVID-19 barimo abarengeje amasaha n’abafatiwe mu kabari ndetse n’abatambaye agapfukamunwa .

Aba bafashwe barajwe muri Stade ya Gisagara ahazwi nko muri Gymnase  iherereye mu murenge wa Ndora .Abafashwe bose bahanwe  bacibwa n’amande ya 5000 Frw mu rwego rwo kubereka ko kurenga ku mabwirza ari icyaha gikomeye ndetse no kugira ngo bibere n’abandi urugero bumva ko kubahiriza amabwiriza yo kurwanya Covid-19 bitabareba .

Bamwe mu baturage baraye bafatiwe mu mirenge itandukanye y’Akarere ka Gisagara, bavuga ko ubusanzwe icyorezo cya COVID-19 kibahangayikishije kuko cyanamaze kugera mu Karere kabo bityo ko bari bakwiye kumva neza uburemere bwacyo bavuga kandi ko bibabereye isomo rikomeye rigiye gutuma buri wese aba ijisho rya mugenzi w’undi bagafatana urunana mu kurwanya icyorezo cya  Covid-19

Karemera Joseph Usanzwe ukora umwuga wo gutwara abantu wafashwe aherekejwe n’umuturanyi we  avuga ko yafashwe mu masaha ya saa Mbili n’igice avuye gusura mugenzi we  kuko yumvaga ari yageze mu rugo ntakibazo .Avuga ko kuba ari umuturanyi bidakuraho kubahiriza amabwiriza yo kwirinda Covid-19 ati” na bagenzi bange bumvireho umuturanyi si uwo gusura mu masaha abujijwe”.

Karemera Joseph 

Uwitonze Dative wo mu Kagari ka Rwamiko mu  Murenge wa Muganza wafashwe asohotse mu rugo atambaye agapfukamunwa agiye guhaha ibyo bararira kuri butike baturanye, avuga ko yahise ahura na polisi igahita imutwara akarara ukubiri n’abana ndetse bakarara ubusa, avuga ko isomo ahakuye azaribwira n’abandi bose ko Covid -19 ari icyorezo gikwiye kwirindwa na buri wese akavuga ko abatarabyumva bakwiye kubyumva badacunganwa n’inzego z’umutekano cyangwa abayobozi.

Uwitonze Dative

 Umuyobozi w’Akarere ka Gisagara wungirije ushinzwe iterambere ry’ubukungu, Habineza Jean Paul avuga ko bahagurukiye guhangana n’abica amabwiriza yo kwirinda Covid-19, akavuga ko  bazakomeza kwigisha abaturage ariko ko n’abakomeje kuvunira ibiti mu matwi batazihanganirwa.

Umuyobozi w’Akarere ka Gisagara wungirije ushinzwe iterambere n’ubukungu Habineza Jean Paul.

Nyampinga Aline




One thought on “Gisagara:Abantu 64 bafashwe batubahiriza amabwiriza yo kwirinda Covid-19

Leave a Reply

Your email address will not be published. Required fields are marked *