Abantu bakingiwe COVID19 mu Rwanda bakomeje kugaragaraho ubwandu bageze kuri 700

Imibare y’abandura COVID-19 igaragaza ko hari abakingiwe ariko bakomeje kwirara, ku buryo imibare y’abandura ikomeje kuzamuka uko bwije n’uko bukeye.

Umuyobozi Mukuru w’Ikigo cy’igihugu cy’ubuzima, Dr Nsanzimana Sabin, yavuze ko hari abantu bakingirwa ugasanga babaye ikiraro cyo kwanduza abandi, bikongera ikibazo ku rwego rw’ubuzima.

Yavuze ko inkingo za COVID-19 zimaze kwemezwa zidakingira abantu kwandura, ahubwo zibarinda kuzahazwa n’iki cyorezo.

Ati “Inkingo zose zihari za COVID-19 zemejwe ku Isi, ibyo bintu zishobora kubikora 100% ariko nta rukingo na rumwe wavuga ngo 100% uwarubonye nta hantu azahurira na COVID.”

“Warakingiwe birashoboka kuyandura, imibare turayifite tumaze kugira abarenga 600 hafi 700 bakingiwe ariko bakaza gupimwa bagasanganwa COVID, icyo bose bahuriyeho ni uko ntabwo barembye ngo bajye Nyarugenge cyangwa i Kanyinya cyangwa ahandi ngo bahabwe umwuka, ni nacyo urukingo rugamije.” Hari mu kiganiro ku Isibo TV.

Ni nayo mpamvu ngo nubwo abantu bakingirwa bagomba gukomeza kwirinda, ngo hato batandura bakaza kwanduza abatarakingiwe bagahura n’ibibazo.

Dr Nsanzimana yavuze ko imibare y’abandura irimo gutumbagira kubera imyitwarire y’abantu idahuye no kwirinda iki cyorezo, kandi kwirinda kwandura COVID-19 byakabaye byoroshye.

Ati “Njyewe mu buryo buziguye bw’aho tugeze, abantu bakwiye kubona ko ntabwo bimeze neza na gato, twizere ko iyi saa moya hari ikintu iri buze kumanuraho.”

Kugeza ubu abantu barimo gushishikarizwa kwicara ahantu hafunguye cyangwa bakicara hanze, cyangwa igihe bari mu modoka bagafungura ibirahuri.

Dr Nsanzimana yakomeje ati “Abakingiwe rero kubera ko ari bake cyane, tubasaba ko bakomeza bakitwararika kugeza igihe tuzakingirira benshi, bityo kuba wayanduza abantu benshi bikaba byagabanyutse.”

Kugeza ubu mu Rwanda abantu bamaze gukingirwa ni 391,675 hakoreshejwe inkingo za Pfizer-BioNtech na AstraZeneca. Barimo 248,718 bamaze guhabwa doze ya kabiri y’urukingo rwa AstraZeneca.

CelebzMagazine.com




Leave a Reply

Your email address will not be published. Required fields are marked *