Zimbabwe:Abaturage mu imyigaragambyo yo kwamagana Perezida Mugabe

Nyuma y’aho igisirikare gikoze ibikorwa bimeze nk’aho ari uguhirika ubutegetsi bwa Perezida Robert Mugabe ,Noneho ubu,kuri uyu wa 18 Ugushyingo 2017, Abaturage ba Zimbabwe bateguye imyigaragambyo isaba Perezida Robert Mugabe kwegura.

Iyi imyigaragambyo yateguwe n’abaturage  biteganyijwe ko iraba ishyigikiwe n’igisirikare cyafashe ubutegetsi ku wa Gatatu w’iki cyumweru, kivuga ko gishaka kwitambika ko Mugabe yasimburwa n’umugore we Grace n’agatsiko ka G 40 kamushyigikiye ndetse no guhangana na bamwe mubakoze amakosa yo gukoresha nabi umutungo w’igihugu.

Byose byatangiye Mugabe yirukanye Visi-Perezida, Emmerson Mnanganwa, wahabwaga amahirwe yo kumusimbura, ibintu byafashwe nko gushyigikira umugore we.

Mugabe yari asigaye ashyigikiwe n’amashami yo mu Ntara y’ishyaka rye, Zanu PF na bamwe mu bo bafatanyije mu rugamba rwo kubohora Zimbabwe ariko nabo batangiye gusaba ko yegura.

Bamwe mu bayoboke ba Zanu PF baramukiye mu myigarambyo yo kwamagana Perezida Mugabe.

BBC yanditse ko abayobozi b’ishyaka rya  Zanu PF hafi ya bose bagaragaye kuri Televiziyo y’Igihugu basaba ko Mugabe yegura, Grace Mugabe akirukanwa mu ishyaka, Visi-Perezida wirukanwe Mnanganwa agasubizwa muri Komite Nkuru yaryo.

Kuri uyu wa Gatanu, Abanya-Zimbabwe batangajwe no kubona Mugabe, w’imyaka 93, wari umaze iminsi ine afungiwe iwe mu rugo, yongeye kujya ahagaragara akitabira ibirori byo gutanga impamyabumenyi za kaminuza.

Bamwe mu bitabira imyigaragambyo barimo Umunyamategeko Fadzayi Mahere bamagana Umuryango w’Ibihugu bya Afurika y’Epfo, SADC, uyobowe na Perezida Jacob Zuma, watumye habaho ibiganiro hagati y’igisirikare na Mugabe.

Igisirikare kivuga ko ibyavuye mu biganiro bari kugirana nawe bizatangazwa vuba bishoboka.

Christopher Mutsvangwa, Umuyobozi w’Ishyirahamwe ry’abavuye ku rugerero bahoze bashyigikiye Mugabe yasabye abaturage kwitabira imyigaragambyo ari benshi.

Ati “Dushaka kwisubiza ishema kandi uyu niwo munsi […] dushobora kurangiza akazi igisirikare cyatangiye. Nta gusubira inyuma ku bijyanye na Mugabe. Agomba kuvaho.”

Igisirikare cyavuze ko “Gishyigikira iyo myigaragambyo igihe cyose iraba mu mutuzo itarimo amagambo arimo urwango cyangwa gukangurira abaturage ubugizi bwa nabi.”

Ubwo Mugabe yatangaga impamyabumenyi muri Kaminuza ya Open University ku wa Gatanu tariki ya 17 Ugushyingo 2017, umwe mu bo yayihaye ni Marry Chiwenga, umugore wa Constantine Chiwenga, Umugaba w’Ingabo watanze itegeko ko afungirwa imuhira.

Grace Mugabe byavugwaga ko yari yahunze aracyari imuhira hamwe n’umugabo we.amakuru akaba yari yatangajwe ko yahungiye mu gihugu cy’abaturanyi Namibie andi akavuga ko yaba yaratawe muri yombi.

Zigama Theoneste-celebzmagazine.com




Leave a Reply

Your email address will not be published. Required fields are marked *