Umutoza wa Kiyovu Sports arifuzwa n’ikipe yo muri Kenya

Cassa Mbungo, utoza ikipe ya Kiyovu Sports yo mu Rwanda ari ku rutonde rw’abatoza bashakishwa n’ikipe yo muri Kenya ya AFC Leopards. 

Ikipe ya  AFC Leopards yatozwaga n’umutoza witwa Rodolfo Zapata ukomoka muri Argentine, hakaba hashize iminsi mike ayisohotsemo, mu bavugwaho bashobora kumusimbura na Cassa akaba avugwamo.

Mu gitondo cyo ku wa Gatatu tariki ya 3 Ukwakira 2018, nibwo ibinyamakuru byo muri Kenya byagarutse cyane kuri Cassa ko ashobora kurambagizwa, agatoza iyi kipe ya AFC Leopars itaraitwaye neza umwaka ushize wa shampiyona.

Uyu mutoza w’ikipe ya Kiyovu Sport Cassa Mbungo, yagarutsweho mu bitangazamakuru byo muri Kenya muri iki gitondo ko ari mu bifuzwa cyane n’ikipe ya Leopards yitwaye nabi mu mikino ya shampiyona.

Ikinyamakuru Goal.com cyo muri Kenya kiganira n’umwe mu bayobozi b’iyi kipe, yagize ati “Ni umutoza mwiza wagize uruhare mu kuzamura abakinnyi barimo Moustapha Francis na Tuyisenge Jacques ba Gor Mahia, twizera ko aje aha hari icyo yafasha ikipe yacu”.

Ikipe ya AFC Leopards iri ku mwanya wa 6 ku rutonde rw’agateganyo rwa shampiyona yo muri Kenya, ikaba irushwa n’umukeba Gor Mahia amanota 19 mu gihe hasigaye umukino 1 shampiyona ikarangira.

Munezero Janvier/ Celebzmagazine.com




Leave a Reply

Your email address will not be published. Required fields are marked *