Umuti usukura intoki wasanzwemo 99% bya Methanol wahagaritswe

Ikigo Gishinzwe Kugenzura ibiribwa n’Imiti mu Rwanda (Rwanda Food and Drugs Authority/ Rwanda FDA), cyahagaritse icuruzwa n’ikoreshwa ry’umuti usukura intoki (Hand Sanitizer) wanditseho “99% Methanol Alcohol upfunyikwa n’Ikigo KVM Co ltd.

Ubuyobozi bwa Rwanda FDA butangaza ko uwo muti wahagaritswe ku Isoko kuko wagira ingaruka ku buzima bw’abawukoresha, cyane ko ikinyabutabire  metanolo (methanol) bivugwa ko ukozwemo kidakoreshwa mu kwica udukoko.

Ubusanzwe Methanol ikunze gukoreshwa mu gufungura ibikomoka kuri peteroli ndetse no gusukura imyanya y’ibinyabiziga binywa mazutu cyangwa lisansi. Hari n’abubatsi bakoresha icyo kinyabutabire mu gufungura amarangi, ndetse no kuvanga “mastique”.

Itangazo ryashyizwe ahagaragara na Rwanda FDA risobanura ko uyu mwanzuro wafashwe hashingiwe ku kuba uyu muti usukura intoki ugaragaza ko urimo méthanol ku kigero cya 99% no ku makuru ku ikorwa ryawo.

Uyu muti waciwe ku isoko ry’u Rwanda

Iki kigo gitangaza ko méthanol itica virusi cyangwa utundi dukoko nka bagiteri ahubwo ko yangiza uruhu n’imyanya y’ubuhumekero mu gihe umuntu ayihumetse, ndetse ishobora kwaka bikaba byateza inkongi y’umuriro mu gihe itabitswe neza.

Gikomeza gitangaza ko mu gukora imiti isukura intoki, hakoreshwa alucolo yo mu bwoko bwa “isopropyle” cyangwa iyo mu bwoko bwa éthanol.

Ingano ya ethanol igomba kuba iri hagati ya 70-80% naho isopropyle ikaba iri ku kigero cya 75% hakiyongeraho n’ibindi biyigize birimo peroxyde d’hydrogène na glycérine.




Leave a Reply

Your email address will not be published. Required fields are marked *