U Rwanda rwagurijwe miriyoni 20 z’amadorari kugeza amashanyarazi mu bice by’icyaro

Banki y’Abarabu Itsura Amajyambere (BADEA) yagurije u Rwanda miriyoni 20 z’amadorari, ni ukuvuga miriyari nka 18 z’amanyarwanda azakoreshwa mu kugeza amashanyarazi ku ngo 24.000.

Minisitiri w’Imari n’Igenamigambi Dr. Ndagijimana Uzziel ni we wasinyiye iyo nguzanyo kuri uyu wa Gatatu tariki 6 Werurwe 2019.

Iyi nguzanyo nk’uko bisobanurwa na Minisitiri w’Imari n’Igenamigambi ngo izifashishwa mu gucanira ibice by’icyaro biherereye mu Ntara y’Amajyepfo, by’umwiharimo Uturere twa Nyamagabe na Nyaruguru.

Yagize ati “Banki y’Abarabu Itsura Amajyambare iduhaye inguzanyo izadufasha kugeza umuriro w’amashanyarazi mu turere tubiri tw’Intara y’Amajyapfo, Nyamagabe na Nyaruguru.”

Aha abayobozi bombi bakomeje kwishimira umurimo wo gusinya amasezerano basoje.

Dr. Ndagijimana yavuze ko iyi nguzanyo izafasha ingo kubona umuriro w’amashanyarazi, imirimo ikaba igiye gutangira vuba, ikazarangira muri Werurwe mu mwaka wa 2023.

Minisitiri Ndagijimana yavuze ko ari inguzanyo izishyurwa ariko ngo itari nk’imwe y’amabanki itangwa ku nyungu nyinshi ko ahubwo ari inguzanyo yishyurwa amafaranga make cyane ku buryo nta kibazo cyo kwishyura kigaragara.

Minisitiri Gatete avuga ko iyi ari gahunda igihugu kihaye yo kugeza mu gihugu cyose amashanyarazi 100% bitarenze mu mwaka wa 2024.

Abaturage b’uturere twa Nyamagabe na Nyaruguru bangana na 846.000 ariko ngo abazagerwaho n’uyu mushinga bose bakaba ari abaturage 156.000, abafite amashanyarazi bakazava kuri 33% bakagera kuri 52% mu gihe umushinga uzaba urangiye.

Umuyobozi w’Inama y’ubutegetsi ya BADEA Eng. Yousif Bin Ibrahim AL BASSAM avuga ko BADEA yashinzwe muri Gashyantare 1974, ifite intego yo kugira uruhare mu iterambere ry’ibihugu by’Afurika bihuriye mu Muryango w’Afurika Yunze Ubumwe.

Uyu muyobozi avuga ko we n’itsinda ayoboye baje mu Rwanda kuhakorera inama kuko bishimira imiterere y’igihugu n’umutekano uharangwa, ariko hari na gahunda yo gusinyana amasezerano na Minisiteri y’Imari n’Igenamigambi kuri iyi nguzanyo bahawe.

Yemeza ko iyi nama y’ubutegetsi ya BADEA banafunguriwe na Minisitiri w’Imari n’Igenamigambi w’u Rwanda irimo gutegura inama ya 44 ya ba Guverineri b’amashami ya BADEA iteganyijwe kubera mu gihugu cya Koweit ku matariki ya 24 na 25 Mata 2019.

Yavuze ko inguzanyo yose BADEA izaha u Rwanda ingana na miriyoni 190 z’amadorari y’Amerika, bakaba bafite ikizere cyo kuyikoresha neza nk’uko bisanzwe.

Hagenimana Thierry-Celebzmagazine.com

BANA NATWE TUGUSUSURUTSE UMENYE




Leave a Reply

Your email address will not be published. Required fields are marked *