Social Mula ahanzwe ijisho Prix Découvertes RFI

Social Mula ari ku rutonde rw’abahanzi 10 bari guhatanira igihembo cya Radiyo y’Abafaransa, RFI, kizwi nka Prix Découvertes RFI muri uyu mwaka wa 2019.

Uyu muhanzi ahanganye n’abandi batandukanye bo mu bindi bihugu bya Afurika barimo NG Bling wo muri Gabon, Zonatan wo mu birwa bya Maurice, Yann’Sine wa Maroc, Cysoul na Lydol bo muri Cameroon, Bebe Baya wo muri Guinée, Céline Banza wo muri Repubulika Iharanira Demokarasi ya Congo, Anycris wo muri Côte d’Ivoire na Nasty Nesta wo muri Bénin.

Social Mula muri iri rushanwa indirimbo ye yise ‘Ma Vie’ niyo yajyanyemo.

Yabwiye IGIHE ko yiyandikishije binyuze kuri internet agategereza igihe cyo gutangaza abagomba guhatanira iki gihembo none akaba yaje kwisangamo.

Ati “Hari aho batoreraga narahabonye nanjye nkurikiza amabwiriza yose, ni uko banyakiriye. Hari hiyandikishije abantu benshi ariko bashakamo 10 njyewe rero nagize amahirwe y’uko abo 10 bashakaga nabotsemo.”

Yavuze ko yishimye cyane akimara kumenya ko yatoranyijwe dore ko yari amaze iminsi ahawe icyizere.

Ati “Nkimara kumva ko bantoranyije byanshimishije nahise numva ko bishoboka. Mu minsi ishize bari bampamagaye bambwira ko mpagaze neza nshobora kugaragara mu 10 bahatanira igihembo, nabonetsemo rero. Babonye ko mu Rwanda hari impano zitandukanye kuva Buravan yakwegukana iki gihembo.”

Related image

Social Mula yatangiye umuziki mu 2013. Icyo gihe yafashwaga n’inzu itunganya umuziki ya The Zone. Yibandaga cyane ku ndirimbo zo mu njyana ya Dancehall na Afrobeat ndetse hari nyinshi yakoze muri ubu buryo zakunzwe nka ‘Abanyakigali’, ‘Umuturanyi’ n’izindi.

Mugwaneza Lambert [Social Mula] w’imyaka 26 yavukiye ku Rwesero mu Karere ka Gicumbi ariko ubu atuye mu Mujyi wa Kigali.

Iki gihembo cya Prix Découvertes RFI ari guhatanira umwaka ushize cyatwawe n’umunyarwanda Buravan.

Umuhanzi wegukanye iki gihembo ahabwa amayero ibihumbi icumi [€10,000] ndetse no gufashwa gukora ibitaramo bizenguruka Afurika na kimwe gikomeye uyu muhanzi ategurirwa i Paris mu Bufaransa.

Ushaka guha amahirwe Social Mula kanda hano https://musique.rfi.fr/prix-decouvertes/vote




Leave a Reply

Your email address will not be published. Required fields are marked *