Pep Guardiola na Dias begukanye ibihembo by’umwaka muri Premier League

Myugariro Ruben Dias wa Manchester City yatowe nk’umukinnyi w’umwaka wa Premier League, mu gihe umutoza Pep Guardiola na we yabonye igihembo cy’umutoza warushije abandi.

Dias, Umunya-Portugal w’imyaka 24, yagize uruhare rukomeye mu bwugarizi bwa City yegukanye igikombe cya gatatu cya shampiyona muri iyi myaka ine ishize.

Mu kwezi kwa gatanu yatowe n’abanyamakuru bandika imikino nk’umukinnyi warushije abandi mu mupira w’amaguru w’abagabo mu Bwongereza.

Umutoza Guardiola wa City yatowe nk’uwarushije abandi batoza muri Premier League ku nshuro ya gatatu mu myaka ine ishize.

Erik Lamela wa Tottenham ni we wegukanye igihembo cy’uwatsinze igitego cyiza kurusha ibindi, yatsinze mu mukino batsinzwe na Arsenal iwayo mu kwezi kwa gatatu.

Dias yageze muri City mu kwezi kwa cyenda mu mwaka ushize avuye muri Benfica, aguzwe hafi miliyoni 65 z’amapawundi. Yakiniye City imikino 32 ya shampiyona, agira uruhare mu kutinjizwa igitego kwayo mu mikino 15.

Batsinze 23 mu mikino ya shampiyona Dias yakinnye, banegukana igikombe cya Carabao Cup ndetse basoza ku mwanya wa kabiri muri Champions League.

Uwegukanye icyo gihembo yatowe na rubanda binyuze ku rubuga rwa EA Sports, ayo majwi ahuzwa n’aya ba kapiteni 20 b’amakipe yo muri Premier League ndetse n’ay’inteko y’inzobere mu mupira w’amaguru.

Dias yari ahatanye na Kevin De Bruyne wa Manchester City, Harry Kane wa Tottenham wegukanye igihembo cy’uwatsinze ibitego byinshi (Golden Boot), Bruno Fernandes wa Manchester United, Mohamed Salah wa Liverpool, Mason Mount wa Chelsea, Tomas Soucek wa West Ham na kapiteni wa Aston Villa Jack Grealish.

Ku gihembo cy’umutoza wahize abandi, Guardiola we yari ahatanye na bagenzi be Marcelo Bielsa, David Moyes, Brendan Rodgers na Ole Gunnar Solskjaer. Mu kumutora, amajwi y’abaturage yahujwe n’ay’inzobere mu mupira w’amaguru.

Kuba Guardiola yari asanzwe yaregukanye iki gihembo ubwo aheruka gutwara shampiyona mu myaka ya 2017-2018 na 2018-2019, iki cya gatatu yegukanye gitumye anganya umubare w’ibyo bihembo na Arsène Wenger na Jose Mourinho.

Sir Alex Ferguson wenyine ni we ubarusha kucyegukana ikenshi, inshuro 11 zose hamwe.

Umutoza Pep Guardiola na Dias ba Manchester City begukanye ibihembo by’umwaka muri Premier League

REBA HANO VIDEO TWAGUHITIYEMO YAGUSUSURUTSA

Bana natwe tugususurutse umenye

NGIRINSHUTI Christian




Leave a Reply

Your email address will not be published. Required fields are marked *