MINECOFIN: Ibiciro ku masoko y’u Rwanda bizazamukaho 6.9% muri 2020

Igipimo k’izamuka ry’ibiciro kizakomeza kuba hejuru, bitewe ahanini n’ubwiyongere bw’ibiciro by’ibiribwa ku isoko , nk’ Minisiteri y’ Imari n’ Igenamigambi (MINECOFIN)  yabitangaje.

Ubwo yagezaga ku bagize imitwe yombi y’Inteko Ishinga amategeko ibikubiye mu ngengo y’imari y’Igihugu y’umwaka wa 2020/2021, Minisitiri w’Imari n’Igenamigambi Dr. Ndagijimana Uzziel, yatangaje ko muri uyu mwaka wa 2020 hateganyijwe ko impuzandengo y’izamuka rusange ry’ibiciro ku masoko izagera kuri 6.9%, ariko ntizarenge ku gipimo cya 5% mu gihe giciriritse.

Yasobanuye ko mu gihembwe cya mbere cya 2020, igipimo k’izamuka ry’ibiciro cyakomeje kuba hejuru kuko cyari ku mpuzandengo ya 8.4% hagati ya Mutarama na Gicurasi, ariko agaragaza ko ubwiyongere budakabije ugereranyije na Mutarama-Gicurasi 2019.

Yagize ati: “Igipimo k’izamuka rusange ry’ibiciro kuva Mutarama kugeza muri Gicurasi 2019 ari na cyo kigereranywa na Mutarama-Gicurasi 2020, cyari hasi kuko cyari kuri 0.6%.”

Yasobanuye ko Impamvu y’izamuka ry’ibiciro rishingiye ahanini ku musaruro w’ibihingwa bimwe na bimwe wibasiwe n’ibiza mu gihembwe k’ihinga A, nk’ibishyimbo, umuceri, ibirayi, imboga n’ibindi byatumuye ibiciro by’ibiribwa bizamuka.

Yanongeyeho ko indi mpamvu y’izamuka ry’ibiciro ishingiye  ku izamuka ry’ibiciro byo mu rwego rw’ubwikorezi.

Ubuhinzi n’ubworozi byagenewe miliyari 122.4Frw

Minisitiri Dr. Ndagijimana yatangaje ko mu mwaka w’ingengo y’imari ya 2020/2021 ubuhinzi n’ubworozi byagenewe ingengo y’imari ya miliyari 122.4 z’amafaranga y’u Rwanda mu gushyigikira iterambere ry’urwo rwego.

Ingengo y’imari y’umwaka wa 2020/2021 yagejejwe ku bagize Inteko Ishinga Amategeko ingana na miliyari 3,245.7 z’Amafaranga y’u Rwanda.

Ingengo y’imari yagenewe ubuhinzi n’ubworozi izifashishwa mu gukomeza gukoresha inyongeramusaruro z’ubuhinzi harimo ifumbire mvaruganda n’imbuto z’indobanure, gukomeza Gahunda ya Nkunganire ku bihingwa byatoranyijwe, no gukomeza kongera ibikorwa remezo mu buhinzi bigamije kurwanya isuri hubakwa amaterasi y’indinganire n’imirwanyasuri.

Ati: “Hari kandi gukomeza guteza imbere ibikorwa byo kuhira haba mu bishanga no ku misozi, kimwe n’ikoranabuhanga rito ryo kuhira imyaka, kugira ngo ibihingwa bibashe guhangana n’ihindagurika ry’ikirere”.

Avuga ko hari na gahunda yo gukomeza guteza imbere ibihingwa byoherezwa hanze no kugabanya umusaruro wangirika.

Ati “Hari kandi kurushaho kongera ingano n’ubwiza bw’ibikomoka ku buhinzi twohereza mu mahanga harimo ikawa n’icyayi no gutanga ingurane ahazagurirwa ubuhinzi bw’icyayi. Harimo kandi kugabanya igihombo kigaragara mu gihe cyo gusarura hubakwa ubwanikiro n’ubuhunikiro bishya”.

Yavuze kandi ko ingengo y’imari yagenewe ibikorwa by’ubuhinzi izanafasha gukingiraamatungo indwara zitandukanye no kuyatera intanga.

ivomo:IN




Leave a Reply

Your email address will not be published. Required fields are marked *