Menya Benjamin Dube utegerejwe mu gitaramo gihimbaza Imana i Kigali

Umuhanzi Bonani Benjamin Dube uririmba indirimbo zo kuramya Imana ku ya 11 Kanama 2019 azataramira i Kigali mu gitaramo azahuriramo n’abaririmbyi batandukanye barimo Shekinah Worship Team.

Uyu muhanzi ubusanzwe yitwa Bonani Benjamin Dube akaba yaravukiye i Johanesburg muri Afurika y’Epfo akaba yaravutse ku ya 23 Mutarama 1962.

Mu muryango akomokamo ni we bucura mu bana batanu ba nyakwigendera Benjamin Dube na Grace Dube.

Ababyeyi ba Benjamin Dube

Ubwo yari afite imyaka 12 baririmbiraga hamwe mu rusengero nk’umuryango Benjamin Dube akaba yaracurangaga gitari akanaririmba.

Kuba bararirimbaga mu rusengero ni uko na se yari umupasiteri. Benjamin Dube n’abavandimwe be bakuriye i Soweto mu muryango wa gikirisito.

Se kandi yacurangaga gitari naho nyina yari umuririmbyikazi. Afite imyaka 9 yatangiye kurushaho kwimenyereza gucuranga gitari agize 11 atangira kwimenyereza no gukubita ingoma.

Nyina yakundaga guhamagara abana bose akabigisha indirimbo n’uburyo bahuza amajwi.

Mu bwana bwe Bonani Benjamin Dube yakundaga kuririmba indirimbo yitwa “Oh happy day” ya Edwin Hawskins.

Afite imyaka 14 se yaje kwicwa. Nyuma y’umwaka se apfuye ntibigeze bacika intege kuko baje gukorera ibitaramo bitandukanye mu Buholandi bakaba barajyanye na nyina.

Ubwo barimo gukora ibyo bitaramo nyina yababwiye ukuntu se yishwe. Ibyo byabahaye igitekerezo cyo gukora Alubumu yitwa “Vader vergeef he then” akaba ari amagambo yo mu Kidage asobanura “Data bababarire”.

Iyo Alubumu yose y’izo ndirimbo yanditswe na Bonani Benjamin Dube.

Mu 1978-1979 bakoze indi Alubumu yitwa “Amen”bayikorerwa n’inzu itunganya umuziki yo muri Afurika y’Epfo.

Mu 1980 Bonani Benjamin Dube yashinze itsinda rya muzika akaba yarigaga mu mashuri yisumbuye.

Yaje kwitabira irushanwa rya SABC rijyanye n’ubuhanzi aza kuba ari we wegukana igihembo cya mbere ahembwa ibintu binyuranye.

Muri iryo rushanwa yaje guhura n’uwitwa Chico waririmbaga indirimbo z’ubuzima busanzwe maze aza kumusaba ko bakora itsinda riririmba mu njyana ya Pop maze Dube aba ari we uyobora abaririmba mu buryo bwo guhogoza.

Iryo tsinda icyo gihe baryise “Image”. Bari kumwe bakoranye indirimbo eshatu muri zo Bonani Benjamin Dube yandikamo iyitwa “Valencia”.

Mu 1984-1985 Bonani Benjamin Dube yaje gukora Alubumu n’umuryango we yitwa “We pray for love” nyuma akurikizaho indirimbo ye yitwa “I live joyfully”.

Chico ubwo yavaga mu itsinda agiye gukora muzika ku giti ke yabwiye Bonani Benjamin ngo amusange muri kompanyi yitwa “Dephon Records” kugira ngo na we abe ari ho ajya akorera indirimbo ze.

Gutangira kuririmba muzika ya gikrisito mu itorero Bonani Benjamin Dube yabitangiye mu 1986 ubwo yasohoraga indirimbo yitwa “Holy sprit” ari kumwe na rumwe mu rubyiruko rwo muri korari. Iyo ndirimbo bakoze yaje gukundwa cyane ku maradiyo n’ahandi kandi yaranaguzwe cyane.

Akomeza ubuhanzi bwe mu 1988 yakoze Alubumu yitwa “EBENEZER” mu ndirimbo zari ziyiriho hariho izo yaririmbanye na nyakwigendera Lucky Dube indirimbo zikorwa na Gallo Records.

Icyo gihe Bonani Benjamin Dube yari amaze kumenyekana cyane muri Afurika y’Epfo.

Dube yaje gukorera ibitaramo muri Amerika ahurira ku rubyiniro n’abahanzi bakomeye barimo Mighty Clouds of Joy na Andre Crouche.

Ubwo yari ahugiye mu gukora muzika ye kandi nabwo yaje gukurikira amasomo ajyanye no kwiga gucuranga Piano mu ishuri ryitwa FUBA.

Nyuma yo kwiga we n’umuryango we baje kongera gukora Alubumu yitwa “We are what We are” nabwo ikorwa na Gallo Records isohoka mu 1989. Dube iyo Alubumu na yo ni we wayanditse. Iyo Alubumu kandi yaririmbyemo abahanzi bakomeye nka Mthunzi Namba, Victor Masondo, Sandile Ngema, Isaac Mtshali, Veli Shabangu, John Hassan, Lawrence Matshiza, Thapelo Khomo na Don Laka.

Mu 1989-1990 yakoze Alubumu yitwa “Love Africa”aba ari nayo ya nyuma akorera mu nzu itunganya umuziki yitwa Gallo Records.

Ubwo yahagarikaga gukorana n’iyo nzu itunganya umuziki yaje gukorana n’indi nzu itunganya umuziki yitwa “EMI Division”maze imukorera Alubumu yitwa “Benjamin Dube” ikorwa n’uwitwa “Sizwe Zako”.

Amateka ya Bonani Benjamin Dube ni maremare cyane kuko ni icyamamare ari mu bahanzi baririmba indirimbo za gikirisito bakomeye muri Afurika.

Akazuba Cynthia

Bana natwe tugususurutse umenye




Leave a Reply

Your email address will not be published. Required fields are marked *