Kigali:Urutonde rw’abahanzikazi bakundwakaje bagenda badasezeye ku bwo gutinya gushya barura

Uko iminsi yicuma niko umwuga w’umuziki urushaho  gutunga abawukora mu Rwanda, gusa ikibabaje ni uko umubare w’abakobwa bawukora ukiri hasi cyane bamwe ndetse bakagenda bawusezerera bucece.

Mbera y’amateka mabi ya Jenoside yakorewe Abatutsi mu 1994 abahanzi b’igitsinagore bakoraga umuziki wari muto cyane hafi ya ntawo. U Rwanda rumaze kubona ubutegetsi bubereye abaturage, iterambere, ubwisanzure, umutekano n’umudendezo bimaze kuganza igihugu cyabonye umubare munini w’abahanzi biganjemo igitsinagabo gusa abagore na bo ntibasigaye inyuma dore ko bagendera ku muvuduko n’inkubiri y’iterambere rya muzika mu Rwanda ndetse no ku rwego mpuzamahanga.

 

Nubwo abahanzi b’igitsinagore biyongereye mu Rwanda ku buryo bushimishije mu myaka 20 ishize, hari abawugezemo bararirimba ndetse barakundwakazwa gusa urucantege rurimo ni uko benshi muri bo baseta ibirenge abandi ugasanga umuziki wabo uragenda biguruntege ku mpamvu zitandukanye.

Ntawakwirengagiza ingufu, igikundiro , umurava no gukunda umuziki byaranze abahanzi nka Miss Jojo, Victoire(aririmbye ‘Urwo ngukunda’), Liza Kamikazi n’abandi , bagaragaje mu gihe cyabo. Kugeza ubu bamwe baracyakora umuziki bahanyanyaza abandi bawuvuyemo mu gihe hari abari mu kazuyazi, barakora ubundi bagafata ikiruhuko, mu buryo butazwi.

Benshi mu bakobwa bagiye bivana mu muziki cyangwa bagacika intege, byaturutse ahanini ku kuba barashinze ingo, ababivanywemo n’imiryango, abatewe inda zitateganyijwe, amasomo, kujya hanze y’u Rwanda n’izindi mpamvu zitandukanye.

Aba bakobwa n’abagore  bari kuri uru rutonde hari abavuye mu muziki burundu, harimo abagihanyanyaza ariko badafite icyerekezo, abaseta ibirenge, abagiye bucece n’abandi bacecetse ku mpamvu zabo bwite.

Tete Roca

Umulisa Gashugi Divine benshi bamenye nka Tete Roca yatangiye muzika muri 2009. Uyu mukobwa yaciye ibintu muri 2010 na 2011 kubera ikinyoma yihimbiye ko akundana na Sean Paul, nyuma yagiye avugwa cyane mu dushya yakoraga mu bitaramo cyane cyane mu myambarire ye, ubushyamirane yagiranaga na bagenzi be.

 

Benshi bamwitaga Lady Gaga wo mu Rwanda.

Mu buhanzi Tete Roca yari umuririmbyi, umwanditsi w’indirimbo n’amakinamico, ubu akaba atakibarizwa mu muziki dore ko vuba aherutse gushinga urugo. Zimwe mu ndirimbo za Tete zamenyekanye cyane harimo gapapu, Ndabaza, Indahemuka n’izindi nyinshi.

Lizz

Uyu mukobwa yari afite ijwi ryakundwaga na benshi. Azwi cyane mu ndirimbo yitwa ‘Ndagushimira’ yakoranye na Lil G hamwe na Diplomate ndetse n’iyitwa ‘Inshuti’ yakoranye na Riderman.

Mu ntangiriro za 2011 uyu mukobwa yari umwe mu baririmbyi bakomeye mu Rwanda ariko nyuma y’igihe gito yahise azimira kugeza ubu ntiyigeze atangaza niba akiririmba cyangwa yarabiretse.

El Poeta

Amazina ye Umubyeyi Zuena. Ni umwe mu bakobwa b’abaraperi bigaragaje cyane mu Rwanda. Yakajije umurego cyane mu muziki nyuma yo gukundana na PFLA, ubuhanzi bwe bwasembuwe no kwinjira mu itsinda rya Imperial Mafia Land ryashinzwe n’uyu muraperi wahoze muri Tuff Gang. Nyuma y’uko muri Mutarama 2010 yabyaranye na PFLA, El Poeta yagiye acika intege buhoro buhoro kugeza ubwo muri 2012 yeruye ko avuye mu bya muzika.

 

Ijwi rye ryumvikana mu ndirimbo ‘Hora kibondo’ no mu ndirimbo ‘Menya Ibyawe’, ya mbere y’itsinda IMS. Yagiye akorana izindi na P-Fla harimo ‘Akabindi k’umurozi’.

Queen Ally

Uyu muhanzi yubatse izina mu myaka ya 2008 akaba yaramamaye cyane mu ndirimbo yakoranye na Mako Nikoshwa bari bise ‘Urihe’ ndetse n’iyo yakoranye na Rafiki yitwa ‘Bamuhora iki’. Nyuma y’umwaka wa 2009, uyu muhanzi yagiye acika intege gake gake kugeza ubwo muri iyi minsi bamwe bamaze kumwibagirwa. Biragoye kumva indirimbo ye icurangwa ahantu runaka.

Sacha Kat

Agasaro Sandrine benshi bazi ku izina rya Sacha Kat ni umwe muhanzi bakunze cyane kwifashishwa mu mashusho y’indirimbo, amafoto ye yagiye akoreshwa mu kwamamaza ku byapa . Uyu muhanzi yacikirije amashuri ye ageze mu mwaka wa kabiri mu mashuri yisumbuye ari bwo yatangiraga gucengerwa n’iby’ubuhanzi.

 

Sacha yakundanye na Nizzo wo muri Urban boys gusa iby’urukundo ntibyaje kubahira dore ko uyu mukobwa yaje kwibaruka umwana utari uwa Nizzo.

Yakoze indirimbo nyinshi nka Igikwiye yakoranye na Dany Nanone, Nsobanurira yakoranye na Bably n’izindi gusa kuri ubu yaribagiranye mu cyitwa muzika.

Ganzo

Maryse Bonhomme Gwiza, ni umuhanzi watangiye kwigaragaza muri 2009 na 2010 ubwo yigaga mu cyahoze ari Kaminuza Nkuru y’u Rwanda, ishami ry’ubumenyi bwa mudasobwa (Computer Science).

 

Yamenyekanye cyane mu ndirimbo zivuga ku muco kandi yagize umwihariko w’ijwi rye, yakoze indirimbo Ubuntu, Wowe, Byakubaho n’izindi nyinshi. Nyuma yo kwibaruka yavuye mu muziki nka nyomberi kugeza ubu nta wamenya aho abarizwa.

Princess w Junior

Muri 2009, uyu muraperikazi yegukanye igihembo cy’umuraperikazi w’umwaka wa 2008 muri Salax Awards. Muri uyu mwaka yari mu kibuga cya hip hop mu bakobwa asa n’uri wenyine. Benshi bamwibuka mu ndirimbo ye ‘Haguruka ukore’. Kuri ubu ntawapfa kumenya aho uyu mukobwa yagiye.

Victoire

Uyu muhanzikazi yamenyekanye mu Rwanda kubera indirimbo ze z’urukundo harimo Urwo ngukunda n’izindi wasangaga zicurangwa ku radio na cassette zazo zigurishwa cyane. Victoire ari mu bahanzi ba mbere bamenyekanye umuziki w’ubu ukizamuka mu myaka ya 2005 na 2006. Indirimbo ‘Urwo ngukunda’ ikaba itaraburaga mu ndirimbo zasabwe kuri radio Rwanda kuva kuwa mbere kugeza ku Cyumweru. Kugeza uyu munsi ntamuntu uzi aho uyu muhanzi yagiye dore ko atasezeye.

Hari amakuru avuga ko yaba yibera i Burayi, ariko ntawe uzi niba agikora umuziki cyangwa yarabivuyemo burundu.

Passy (Stamina)

 

Uyu mukobwa yamenyekanye cyane kubera indirimbo Stamina ya Eddy Kenzo yabyinnyemo. Muri 2012 yaje kwinjira muri muzika akomwa mu nkokora n’inda yatewe, ibya muzika abishyira ku ruhande umwaka wa 2013 utangira.

Babla

Mugire Imaaculee winjiye muri muzika nka Babla, mu mpera za 2012 imbaraga yinjiranye ntawamenya aho zarengeye. Babla yamenyekanye cyane mu ndirimbo zamamariza Sosiyete y’itumanaho ya MTN aheruka kandi kumvikana mu bitangazamakuru byinshi byo mu Rwanda nyuma yo gukorana na Kamichi indirimbo ‘Kabimye’ .

 

Nyuma yaje kugaragara mu marushanwa wa Nyampinga w’ikigo cya IPRC ari naho yiga, gusa kugeza ubu araseta ibirenge mu muziki.

Lil Kays

Uyu mukobwa yamenyekanye cyane ku giti cye gusa igihe cyaje kugera akajya yumvikana aririmba nyikirizo z’indirimbo z’abaraperi cyane cyane PFLA. Nyuma y’uko PFLA aviriye muri Tuff Gang , Lil Kays yacitse intege ndetse aza kuburirwa irengero mu ruhando rwa muzika.

Candy Moon

Ni umuraperi wigaragaje cyane, yaje kujya mu itsinda rya Empire Mafia Land aho yari ahuriye n’abandi baraperi bayobowe na PFLA. Yaje gusa n’uvana ikirenge mu muziki mu ntangiriro za 2013 kubera amasomo arimo hanze y’u Rwanda.

Iryn

 

Ashimwe Iryn umuraperi wigaragaje cyane muri 2012 ubwo yaherekezaga Young Grace ku rubyiniro muri PGGSS2. Yamenyekanye mu ndirimbo ‘Babona ngenda’, ni umwe mu baraperi bafashije Paccy kumurika album ye ‘Miss President’ muri 2012, nyuma yivanye mu muziki bucece amakuru mashya avuga ko yubatse mu mwaka wa 2014.

Jozzy

Uwineza Josiane wamenyekanye nka Jozzy, yatangiye ubuhanzi mu kwezi kwa Gicurasi 2011, ubwo yahimbaga indirimbo ’Nyemera’. Nyuma yaje gukora indirimbo zindi nka ’Salax Awards’ yaririmbanye na Kim Kizito, ’Nizere Nde’ yakoranye na Paccy n’iyitwa ’Njye Nawe’ n’izindi nyinshi.

 

Jozzy yanagaragaye ku rutonde rw’abahanzi 20 mu irushanwa rya Primus Guma Guma Super Star II. Mbere gato yo kwibaruka yasaga n’uwacitse intege muri muzika, amaze kubyara ibye na muzika bizamo kidobya burundu.

Miss Jojo

Uwineza Josiane uzwi ku izina rya Miss Jojo ufatwa nk’umuhanzi mukuru mu bakobwa bakora umuziki w’iki gihe yatangaje ko yavanye akarenge mu muziki gusa ngo igihe nikigera azagaruka.

 

Miss Jojo yatangiye kwigaragaza cyane mu mwaka wa 2005 ubwo yigaga mu cyahoze ari Kaminuza nkuru y’u Rwanda. Usibye umuziki, yakinnye n’umukino wa karate aho afite umukandara w’umukara.

Miss Jojo yamenyekanye mu ndirimbo nyinshi zitanga ubutumwa butandukanye haba urukundo, kwirinda SIDA, umuco, kwibuka, gufasha impfubyi n’izindi nyinshi. Yagiye akorana indirimbo n’abahanzi bo mu Karere nka Kidumu na DNG.

Sister Mireille

 

Niwemuhuza Mireille uzwi ku izina ry’ubuhanzi rya Sister Mireille yamenyekanye mu ndirimbo nka Sinareka umuziki, Abo bana, Nagarutse n’izindi. Ni kenshi yagiye atangaza ko atazigera atenguha abakunzi be gusa kugeza ubu ntawamenya niba akizirikana iryo sezerano kuko aheruka kuvugwa mu itangazamakuru muri 2012.

Rozy

 

Uwishema Roselyne wamenyekanye nka Rozzy yatangiye kuririmba ku giti cye ubwo yigaga mu cyahoze ari Kaminuza y’i Butare aho yitabiraga ibitaramo bitandukanye ndetse akaza no kubikorera i Kigali.

 

Rozy yashinze imizi mu muziki kubera urukundo rwe na Platini wo muri Dream Boyz gusa nyuma yo gutandukana kwabo, Rozy yagiye acika intege kugeza aho yasoreje amashuri ibya muzika akabivamo akinjira mu bakozi b’isosiyete isukura bimwe mu bice by’Umujyi wa Kigali.

 

Bright Girls

Itsinda “Bright Girls” ryari rigizwe n’abakobwa babiri Debut Iradukunda uzwi nka Debby ndetse na Gloriose Mukamabano uzwi nka Gogo. Nyuma yo gushyira indirimbo ebyiri hanze arizo ‘Jye nawe’ na ‘Urwibutso’ muri 2012 bagiye basubira inyuma buhoro buhoro kugeza ubwo baburiwe irengero. Gogo yashinze urugo naho mugenzi we ntibizwi neza aho asigaye aba.Celebzmagazine.com ntitwavuga ko uru arirwo rutonde rw’abakobwa bari bashoboye baje kuzimira kuko nawe aho uherereye hari benshi.Dusangize amakuru kuri infocelebsmagazine@gmail.com

Abdou Bronze-Celebzmagazine.com

 




Leave a Reply

Your email address will not be published. Required fields are marked *