Kidum yahishuye ibihe bigoye abaririmbyi barimo bashobora no kwisanga babuze ibyo kurya

Jean-Pierre Nimbona uzwi cyane nka Kidum, umuririmbyi w’Umurundi uzwi cyane muri aka karere k’Afurika y’uburasirazuba uba muri Kenya, avuga ko ari ibintu birenze ukwemera kuba ubu abantu benshi ku isi batagisohoka mu nzu zabo atari ukubera intambara cyangwa imyuzure, ahubwo ari ukubera icyorezo cya coronavirus.

Kidum yavuze ko nubwo umuryango we – cyo kimwe n’iyindi myinshi muri Kenya – wari wahashye ukiziganira ibiribwa uko iki cyorezo cyagendaga kirushaho gukara, ubu bigoye ku muririmbyi nka we ubona icyo kurya ari uko yakoresheje ibitaramo.

Ati: “Tuguma duteka indyo (ibiribwa) dufise mu nzu, hanyuma abana na bo barabaturungikiye, ku ma ‘internats’ (ibigo aho abanyeshuri biga ari naho baba), ubu tubana n’abana muhira, amashuri yose yarugaye, urumva ni ibintu bigoye kabisa (rwose) gutahura”.

“Akazi kacu twebwe, dukora ahantu hahurira abantu benshi, rero ibyo bitagishoboka, urumva duca twicamara muhira”.

“Mu gutangura rero kwicara, urumva nta kazi gushika isi ironse umuti w’iyi ngorane dufise, [umuti] wa coronavirus”.

Avuga ko nk’umuhanzi ukoresha ibitaramo ahantu hatandukanye hahurira abantu benshi harimo no mu tubari two mu murwa mukuru Nairobi, iki cyorezo kimaze kumugiraho ingaruka zikomeye mu mibereho ye kubera ko abategetsi babujije guterana kw’abantu benshi nk’ingamba yo kwirinda ikwirakwira rya coronavirus.

Ati: “Ncuranga kuva ku munsi wa kabiri gushika ku munsi wa Mungu, rero ntagicuraranga ubuzima nari nsanzwe mbayemo burahindutse, byaciye rero kandi gutangira kwikora ku ntegabizoza (ku mafaranga y’ubwizigame), urumva si ibintu byoroshye, si ibintu byoroshye, sininjiza nguma ndya ibyo nakoreye gusa kera”.

Avuga ko kandi hari ibitaramo yateganyaga gukora byamaze gusubikwa harimo nk’igitaramo cyari kuzabera mu mujyi wa Mombasa ku munsi mukuru wa Pasika, kubera ko abategetsi baho bahagaritse ibintu byose bijyanye n’inzu z’urubyiniro, utubari n’amahoteli.

Hasubitswe kandi n’igitaramo yateganyaga gukorera i Kampala muri Uganda.

Nubwo bimeze gutyo ariko, Kidum w’imyaka 45 y’amavuko yabwiye BBC ko muri iki gihe asigaye amara igihe kinini mu rugo, anyuzamo agafata akanya ko guhimba indirimbo azacuranga igihe iki cyorezo cyaba kirangiye.

Avuga ko iyo amaze guhimba ubu yitwa ‘Hatuachani’, mu Giswayile, bishatse kuvuga ngo ‘Ntiturekanye’, ugenekereje mu Kinyarwanda.

Muri aka karere, Kenya yiyongereye mu bihugu COVID-19 yagezemo

Mu Burundi nta muntu bari bayisangamo cyo kimwe no muri Uganda, mu gihe mu Rwanda bamaze kuyisanga mu bantu 19, Repubulika ya Demokarasi ya Kongo na Tanzania yarahageze.

Ku isi abarenga 280,000 bamaze kuyandura, naho abarenga 11,000 imaze kubica.

Shabani Chris

Bana natwe tugususurutse umenye




Leave a Reply

Your email address will not be published. Required fields are marked *