Imikino 6 y’ingenzi ishobora gutanga igikombe kuri Man City, Liverpool cyangwa Tottenham

Mu gihe urugamba rwo gushaka utwara igikombe cya shampiyona y’Ubwongereza rugikomeje hagati ya Manchester City na Liverpool ziyoboye urutonde by’agateganyo, hari imikino 6 y’ingenzi izagaragaza uzacyegukana hagati y’aya yombi utibagiye na Tottenham irushwa amanota 5, gusa yo ikaba izajya ku kibuga Anfield Road cya Liverpool no kuri Etihad Stadium kwa Man City, bisa n’ibitazayorohera kuhakura amanota atatu.

Urugamba rwo guhatanira igikombe cya shampiyona: Buri kipe ntiyorohewe.

Iyi mikino 6 kuri aya makipe 3, niyo izagena uzegukana igikombe cya shampiyona y’Ubwongereza [Premier League] mu mwaka w’imikino 2018-2019.

1. Manchester United Vs. Liverpool (24 Gashyantare 2019)

Liverpool ntiratsindira Manchester United ku kibuga Old Trafford kuva mu mwaka w’2014.Ikipe bazakina kuri ubu yarahindutse cyane mu bijyanye no kwigirira icyizere, kwitwara neza, n’imyumvire bitandukanye n’iyo batsinze 3-1 mu Ukuboza 2018 ku bwa Jose Mourinho. Uyu mukino akaba ari nawo wabaye uwa nyuma wa Mourinho wasimbuwe na Ole Gunnar Solskjaer.

United kuri uyu mukino irahabwa amahirwe kurusha Liverpool nk’uko abasesenguzi ba ruhago benshi bagenda babigarukaho.

2. Everton vs. Liverpool (3 Werurwe 2019)

Umukino uhuza abakeba b’ibihe byose bo mu gace ka Merseyside (Merseyside Derby), ni umwe mu mikino ishobora kutazorohera Liverpool nubwo umukino uherutse i Anfield mu Ukuboza, Liverpool yari yatsinze 1-0; igitego cyatsinzwe na Divock Origi cyahesheje Liverpool kuyobora urutonde rwa Shampiyona.

Bisa nk’aho Everton izaba ishaka kwihorera nubwo Liverpool imaze imikino 18 idatsindirwa ku kibugu Goodison Park kuva muri 2010.

3. Manchester United vs. Manchester City (16 Werurwe 2019)

Umukino nawo w’abakeba basangiye umugi wa Manchester, nubwo United idafite amahirwe mu batwara igikombe, izagira ijambo ku uzagitwara.

Manchester United izihanganira na Manchester City, mu mukino w’abakeba.

Mu bikombe 2 City iheruka gutwara , yagiye yitwara neza cyane kurusha United kuko nko mu minikino 8 ya shampiyona ishize, yatsinzemo 5 kuri Old Trafford  ibintu bitari bisanzwe mu myaka 10 ishize.

Umutoza Solskjaer ategerejwe kugira icyo akora kuri Ciy isa nk’iyigaruriye United kugira ngo nawe yiyongerere amahirwe yo guhabwa ikipe nk’umutoza mukuru mu myaka iri imbere kuko ubu ayifite by’igihe gito.

Ku rundi ruhande City nayo izakina uyu mukino yigengesereye kuko izaba inategura kwakira umukino wa FA Cup.

4. Liverpool vs. Tottenham (31 Werurwe 2019)

Niba ikipe ya Tottenham ishaka kugaragaza ko yatwara igikombe cya shampiyona, izabyerekanira kuri uyu mukino, uzabera ku kibuga Anfield kuko mu minsi ishize yagiye irangwa no kudahozaho mu mikinire yayo.

Abakinnyi b’imena; Harry Kane na Dele Alli, bazaba bagarutse kuri uyu mukino bishobora kuzaha imbaraga ikipe ya Mauricio Pochettino.

Mu mukino uherutse, Liverpool yari yatsindiye Spurs i Wembley 2-1, bisa nk’aho Spurs izaba ishaka kwihorera.

5. Liverpool vs. Chelsea (13 Mata 2019)

Chelsea yatesheje Liverpool amahirwe yo gutwara igikombe cya shampiyona cya mbere kuva mu 1990, mu kwa kane k’umwaka w’imikino 2013-2014, ku ntsinzi ya 2-0 ku kibuga Anfield.

Liverpool izahangana na Chelsea ikujya iyibuza amahirwe y’igikombe.

Urugendo rwa Chelsea i Anfield, ruzongera kwibutsa abafana ba Liverpool ako kababaro bagize mu myaka 5 ishize.

Uko Liverpool izitwara ku kibuga cyayo bizagenda biyongerera amahirwe, gusa na Chelsea izaba yifuza aya manota 3 kuko ikirwana no kuba mu makipe 4 ya mbere azitabira UEFA Champions League.

6. Manchester City vs. Tottenham (20 Mata 2019)

Uyu mukino nawo uzaba usobanuye byinshi , kuko kuwutsinda ku ruhande rwa City bizayiha amahirwe menshi yo gutwara igikombe, gusa kuri Spurs nayo izaba yaragaruye intwaro zayo; Harry Kane na Dele Alli bamaze iminsi badahari, izaba ishaka gutsinda ngo nayo ibashe gutwara igikombe iheruka mu mwaka w’1961.

Spurs ntifite amateka meza ku kibuga Etihad Stadium kuko imaze kuhatsindira inshuro 1 gusa kuva muri Gucurasi 2010.

Gukomeza kw’aya makipe yombi muri Champions League nabyo bizagira ingaruka kuri uyu mukino kuko zombi zizaba zimaze gukina imikino ya ½ yo kwishyura , bigaragara ko abakinnyi bazaba bananiwe cyane.

Gusa ikindi City irusha aya makipe bihanganye ni ukugira abakinnyi benshi, ku buryo habaho gusimburana, bityo ntibananirwe cyane.Ariko nanone niba  abasore ba Pep Guardiora badashaka kumutaba mu nama, basabwa guha agaciro uyu mukino.




Leave a Reply

Your email address will not be published. Required fields are marked *