Ese koko impanga ishobora kumenya ibiri kubera kuri mugenzi we? Sobanukirwa imiterere y’Impanga

Ubushakashatsi bwinshi bwagiye bukorwa bwatumye abantu barushaho gusobanukirwa imiterere y’impanga, ni nako bwatumaga bakomeza kwibaza ibibazo byinshi bitoroshye kubonera ibisubizo.

Twin sisters : Stock Photo

Ubundi habaho ubwoko bubiri bw’impanga burimo izimeze kimwe (monozygote cyangwa Identical Twin izo mu gifaransa bita vrais jumeaux) n’izitameze kimwe (Dizygote cyangwa fraternal twin (faux jumeaux)).

Impanga zitwa ‘Monozygote’ igihe intanga ngabo imwe yahuye n’intanga ngore bigakora igi rimwe ariko nyuma y’igihe runaka rikazitandukanya hakavamo abana barenze umwe bagakurira mu ngobyi imwe ku buryo niyo bavutse usanga bahuje byinshi birimo imiterere n’imyitwarire.

Ni mu gihe kuri ‘Dizygote’ zo zibaho igihe intanga ngabo zirenze imwe zihuye z’intanga ngore, hakaboneka amagi abiri cyangwa hejuru yayo aho abana bavamo buri wese aba ari mu ngobyi ye ndetse akenshi bakavuka ubona nta kintu na kimwe bahuriyeho.

Kubyara impanga akenshi ni ibintu bikunze guturuka ku ruhererekane rw’imiryango, hari n’abazibyara ariko nyuma yo kwifashishwa uburyo bwo gusama hakoreshejwe ikoranabuhanga (In Vitro Fertilization).

Impanga zisangiye utunyangingo zishobora kugira byinshi zitandukaniyeho

Ubushakashatsi bwakorewe ku mpanga ibihumbi 11 zikomoka mu Bwongereza, bwagaragaje ko iyo zisangiye utunyangingo usanga zihuje imyitwarire ndetse n’indwara umwe arwaye undi akaba yayandura ku buryo bworoshye.

Ubu bushakashatsi bwakozwe mu 2013 ariko bwanenzwe n’abatari bake bavugaga ko izi mpanga zishobora guhuza utunyangingo ibyo bita ‘Monozygote’ ariko ugasanga imico yazo, ibiro, uburebure byose bitandukanye cyane.

Inkuru yigeze gusohoka mu Kinyamakuru The Independent yagaragaje urugero rw’umugore wanywaga inzoga ubwo yari atwite, nyuma akaza kubyara impanga zisangiye utanyangingo ariko umwana umwe akavukana uburwayi bwatewe n’ingaruka z’inzoga (syndrome d’alcoolisme foetal) undi akavuka ari muzima.

Utunyangingo tw’impanga zavuye mu igi rimwe ntiduteye kimwe

Mu gihe abantu bibwira ko impanga zavuye mu igi rimwe (Vrai Jumeaux) zigomba kugira utunyangingo tumwe, siko bimeze nk’uko byagaragajwe n’ubushakashatsi bwakozwe mu 2008 n’abahanga bo muri kaminuza ya Birmingham mu Bwongereza.

Nyuma yo kugereranya imiterere y’uturemangingo tw’impanga 19 zihuje, basanze bamwe muri bo bafite itandukaniro rinini mu miterere y’amaraso yabo (DNA) aho umwe yabaga yihariye igice kinini cya nyina undi yihariye icya se.

Iyi ngo ni nayo mpamvu uzasanga nubwo baba basa ndetse bafite n’imyitwarire ihuye cyane, umwe ashobora kugira uburwayi runaka undi agasigara ari muzima.

Ese koko umwe mu mpanga ashobora kumenya ibiri kuba kuri mugenzi we

Ni inkuru nyinshi zagiye zivugwa ko umwe mu mpanga iyo ahuye n’ikibazo mugenzi we ashobora kubyiyumvamo kabone niyo baba batari kumwe.

Inkuru ikunze kugarurakwako n’iyi mpanga Gemma na Leanne Houghton aho mu 2009, ubwo aba bakobwa bari bafite imyaka 15 umwe yatabaye undi.

Ubwo bari mu rugo, Leanne yari ari kwiyuhagira n’uko afatwa n’igicuri, Gemma wari mu cyumba yaje kugira ibyiyumviro bidasanzwe maze yihutira kujya kureba impanga ye aho yasanze yenda gupfa ariko amukorera ubutabazi bw’ibanze bituma azanzamuka.

Nubwo iyi nkuru ikunze kwifashishwa nk’urugero ariko nta bushakashatsi na bumwe bushingiye ku bumenyi bwari bwakorwa ngo bwemeze ko igihe umwe ari kubabara undi ashobora kubyiyumvamo.

Urubuga Live Science ruvuga ko kuba byari bisanzwe bizwi ko Leanne arwaye igicuri n’undi uwari wese mu muryango yari kujya kumutabara kuko n’ubundi bamuhoraga hafi.

David Maira/celebzmagazine

 

 




Leave a Reply

Your email address will not be published. Required fields are marked *