Claude Puel mu biganiro bikomeye na Leicester city nk’umutoza mushya

Claude Puel ari mu biganiro bikomeye na Leicester City yo mu Bwongereza kugira ngo ayibere umutoza mushya usimbura Craig Shakespeare wirukanwe n’iyi kipe kubera umusaruro muke nkuko tubikesha Skysports.

Uyu mutoza w’imyaka 56 y’amavuko , ukomoka mu bufaransa, yirukanwa muri Southampton muri Kamena uyu mwaka, nyuma yo kurangiza shampiyona ahagaze ku mwanya wa munani muri Premier league ndetse akagera ku mukino wa nyuma wa English Football League ubwo yatsindwaga na Manchester united.

Claude Puel yirukanwe muri Southampton mbere y’intangiriro ya shampiyona 2017-2018

Leicester city yatandukanye n’umutoza wayo Craig Shakespeare mu cyumweru gishize, ubu  irimo gutozwa byagateganyo na Michael Appleton ukomeje kuyobora iyi kipe muri Premier league.

Ku rundi ruhande ariko, mu gihe ibiganiro na Claude Puel byaba bitagenze neza, ikipe ya Leicester irimo kureba ukuntu yagirana ibiganiro na Ronald koeman uherutse kwirukanwa muri Everton nyuma yo gutsindwa cyane muri Shampiyona dore ko yari amaze gutsinda imikino ibiri gusa mu mikino icyenda.

Sean Dyche umutoza wa Burnley nawe ari mu migambi ya Leicester ngo ayibere umutoza mukuru kimwe nuko Everton nayo imwifuza nk’umusimbura wa Koeman.

David Unsworth niwe uri gutoza ikipe ya Everton nk’umutoza w’agateganyo kuri Goodison Park.

Ikipe ya Leicester city ikaba ifitanye umukino wa Shampiyona n’ikipe ya Everton ku cyumweru saa 17h00 kuri Kingpower stadium ku munsi wa cumi wa premier league.

Andi makuru atangazwa na Skysport kuri iyi nkuru ni uko aya makipe yombi yaba Leicester city na Everton atekereza kuri Manuel Pellegrini wahoze atoza Manchester city ngo ababere umutoza.

Uwahoze akinira akanatoza Manchester United, Ryan Giggs nawe amakipe yombi aramwifuza.

Puel, watoje Nice mu Bufaransa yageze mu bwongereza mu mezi 18 ashize, atsinda imikino 12 muri 38 yakinnye muri shampiyona ishize atoza Southampton, arangiza shampiyona ari imbere ho amanota atandatu ikipe ya 17 ( iyamanutse mu kiciro cya kabiri).

DUSHIMIMANA  Aimable-Celebzmagazine.com




Leave a Reply

Your email address will not be published. Required fields are marked *