BAL yari yarasubitswe kubera COVID-19 yasubukuwe hatangazwa amatariki mashya ikazabera i Kigali

Kuri uyu wa Mbere, Umuyobozi wa BAL, Amadou Gallo Fall, yatangaje ko irushanwa rya mbere rya Basketball Africa League rizabera mu Rwanda muri Gicurasi, Kigali Arena ikakira imikino 26.

Irushanwa rya Basketball muri Africa (Basketball Africa League 2020) ryari gusorezwa mu Rwanda mu mwaka ushize, rizaba hagati ya tariki ya 16 n’iya 30 Gicurasi 2021 muri Kigali Arena nkuko byatangajwe n’Umuyobozi Mukuru.

Yagize ati “Uyu munsi nejejwe no gutangaza ko irushanwa rya Basketball Africa League rizaba ku nshuro ya mbere guhera tariki ya 16 Gicurasi, umukino wa nyuma wa mbere ukaba ku Cyumweru tariki ya 30 Gicurasi. Hazitabira amakipe 12 yo mu bihugu 12 bitandukanye bya Afurika, hakinwe imikino 26. Ibi byose bizabera ahantu hamwe hagezweho ku rwego rw’Isi, muri Kigali Arena.”

Yakomeje agira ati “Turashaka gukora irushanwa riri ku rwego rwo hejuru, rizagaraza impano n’urukundo rwa Afurika ku mukino wa Basketball.”

Amakipe 12 yari yabonye itike yo gukina irushanwa rya Basketball Africa League (BAL 2020) ku nshuro ya mbere ni Patriots (Rwanda), GNBC (Madagascar), Ferroviario de Maputo (Mozambique), AS Douanes (Sénégal), AS Police (Mali), AS Sale (Maroc), GS Petroliers (Algérie), FAP (Cameroun), Petro de Luanda (Angola), Rivers Hoopers (Nigeria), Union Monastir (Tunisia) na Zamalek (Misiri).

BAL 2020 yagombaga kuba hagati ya Werurwe na Gicurasi 2020 mu bihugu bitandatu bya Afurika, igasorezwa i Kigali, ariko iri rushanwa ryasubitswe kubera icyorezo cya Coronavirus cyibasiye Isi.

Kigali Arena niyo izakira imikino yose ya BAL 2020 yari yarasubitswe kubera icyorezo cya COVID-19

REBA HANO VIDEO TWAGUHITIYEMO YAGUSUSURUTSA

Bana natwe tugususurutse umenye

NGIRINSHUTI Christian




Leave a Reply

Your email address will not be published. Required fields are marked *