Amukuru y’imikino avugwa i Buraya

Manchester United izagerageza kugura Christian Eriksen, umukinnyi wo hagati wa Tottenham, ku giciro kigabanyije mu kwezi kwa mbere, mu gihe amasezerano uyu mukinnyi ukomoka muri Denmark afitanye na Tottenham yitezwe kurangira mu mpera y’uyu mwaka w’imikino. (Sun)

Ariko Manchester United izahura n’ihatana kuri uyu mukinnyi Eriksen w’imyaka 27, kubera ko Inter Milan yo mu Butaliyani nayo imwifuza. (Express)

Christian Eriksen (ibumoso) n'umutoza we Mauricio Pochettino

Tottenham irashaka kugura Steven Sessegnon, umukinnyi wa Fulham w’imyaka 19 y’amavuko ukina no mu ikipe y’Ubwongereza y’abari munsi y’imyaka 20, ushobora gukina nka myugariro cyangwa umukinnyi wo hagati mu kibuga – nyuma y’ukwezi kumwe gushize Tottenham inaguze impanga ye Ryan kuri miliyoni 25 z’amapawundi. (Sun)

Willian, umukinnyi wa Chelsea ukina ku ruhande ukomoka muri Brazil w’imyaka 31, arashakwa n’uwahoze ari umutoza we Maurizio Sarri kuri ubu utoza Juventus, mu gihe uyu mukinnyi ari mu mwaka we wa nyuma wa kontaro ye yo gukinira Chelsea. (Express)

Liverpool iri kugendera runono umunyezamu Ugurcan Cakir w’ikipe ya Trabzonspor yo muri Turukiya ubarirwa agaciro ka miliyoni 14 z’amapawundi. Abakozi bashinzwe gushakira abakinnyi Liverpool bamwitegereje ubwo uyu mukinnyi w’imyaka 23 yakinaga mu mukino ikipe ye yanganyije na Fenerbahce igitego 1-1 mu mpera y’icyumweru gishize. (Mail)

Arsène Wenger, wahoze ari umutoza wa Arsenal akaba azuzuza imyaka 70 mu kwezi gutaha kwa cumi, arashaka gusubira mu mwuga w’ubutoza – mu gihe hashize amezi 16 uyu Mufaransa asoje igihe cy’imyaka 22 yari amaze atoza Arsenal. (Sun)

Liverpool na Chelsea ziri gushakira kubura hasi kubura hejuru rutahizamu Joe Gelhardt w’imyaka 17 ukinira Wigan Athletic, umaze kuba mu bakinnyi babanza mu kibuga inshuro eshatu muri iyi kipe. (Mirror)

Ukugerageza kwa Bayern Munich ko kugura kuri iyi mpeshyi umukinnyi wo ku ruhande Leroy Sane w’imyaka 23 wa Manchester City, ntacyo kwagezeho kubera kutumvikana ku mushahara uyu Mudage yashakaga. (Manchester Evening News)

Myugariro Kieran Trippier w’imyaka 28 w’ikipe y’igihugu y’Ubwongereza, avuga ko kwerekeza muri Atletico Madrid avuye muri Tottenham mu kwezi kwa karindwi uyu mwaka ari “intambwe yateye”. (Diario AS)

Myugariro Chris Smalling wa Manchester United n’uw’ikipe y’igihugu y’Ubwongereza, werekeje muri Roma, bwa mbere ari ku nguzanyo, ashobora gukomeza gukinira iyi kipe yo mu Butaliyani na nyuma y’uyu mwaka w’imikino. (Manchester Evening News)

Hatem ben Arfa w’imyaka 32 wahoze akina ku ruhande muri Newcastle United, na n’ubu nta kipe arabona akinira, mu gihe uyu Mufaransa avuga ko yanze ubusabe bwinshi bw’amakipe yamwifuzaga kuri iyi mpeshyi. (Mail)

Leroy Sane (iburyo) n'umutoza we Pep GuardiolaLeroy Sane (iburyo) n’umutoza we Pep Guardiola

Real Madrid yumvikanye n’umukinnyi wo hagati Lucas Silva w’imyaka 26 basoza kontaro ye, bivuze ko uyu mukinnyi ukomoka muri Brazil ubu nta kipe afite akinamo. (Marca)

Ikipe y’igihugu ya Nigeria irashaka ko rutahizamu Tammy Abraham wa Chelsea ayikinira aho gukinira ikipe y’igihugu y’Ubwongereza, ndetse Nigeria ikavuga ko uyu mukinnyi w’imyaka 21 yitezweho kubaha umwanzuro we bitarenze mu kwezi kwa kane k’umwaka utaha wa 2020.

Abraham amaze gukinira Ubwongereza mu mikino ya gicuti, ariko aracyashobora guhindura akaba yakinira Nigeria kuko nta mukino yari yakinira Ubwongereza wo mu rwego rw’amarushanwa. (Express)

Michael Owen wahoze ari rutahizamu w’ikipe y’igihugu y’Ubwongereza avuga ko David Beckham bahoze bakinana yatereranye ikipe y’igihugu ubwo yahabwaga ikarita itukura mu mukino w’igikombe cy’isi na Argentine wo mu mwaka wa 1998. (Mirror)

Biteganyijwe ko Wolves iha icyubahiro rutahizamu wayo Raul Jimenez w’imyaka 28, ikamurika umwambaro wa gatatu mushya wayo urimo n’ibara ry’icyatsi kibisi rigendeye ku mwambaro w’ikipe y’igihugu akomokamo cya Mexico. (Express & Star)

Eric Twahirwa




Leave a Reply

Your email address will not be published. Required fields are marked *