Arsenal yateye muri Real Madrid,irashaka Karim Benzema

Umufaransa ukina mu ikipe ya Real Madrid Karim Benzema biravugwa ko ashobora kuva i Bernabeu mu mezi make ari imbere, mu gihe iyi kipe itangaza ko imaze kurambirwa imyitwarire y’uyu mugabo imbere y’izamu, dore ko amaze gutsinda ibitego bibiri kuva uyu mwaka w’imikino watangira.

Uyu mugabo w’imyaka 29 y’amavuko amaze gutsinda igitego kimwe mu mikino icyenda atozwa na Zinedine Zidane muri La Liga naho ikindi gitego yagitsinze mu mukino wa gicuti.

Ikipe ya Arsenal yo mu Bwongereza ntiyitaye ku musaruro muke w’uyu mwenegihugu kimwe na Wenger ni nayo mpamvu yifuza kwibikaho uyu mugabo ngo abe umusimbura wa Alexis Sanchez ushobora kuva muri Gunners mu kwezi kwa mbere.

Ikinyamakuru Diario Gol dukesha iyi nkuru gikomeza kuvuga ko umuyobozi mukuru wa Real Florentino Perez yishimiye igitekerezo cyo kuba Benzema yakwerekeza muri Arsenal.

Sanchez afite amasezerano azarangirana n’uyu mwaka w’imikino 2017-2018, ashobobora  kuva kuri Emirates stadium ku buntu cyangwa ku kiciro cyo hasi mu kwezi kwa mbere umwaka utaha.

Ikipe ya Manchester City nayo yavuzwe cyane ko yivuza uyu mugabo ukomoka muri Chili nkuko Pep Guardiola atahwemye gutangaza ko yivuza ko uyu musore wahoze akinira akanamutoza muri Barcelona ajya mu itsinda ry’abasore atoza.

Sanchez w’imyaka 28 amaze gutsindira Arsenal ibitego 3.

Sanchez yagombaga kwerekeza muri City kuri miliyoni 60 z’amapawundi ariko ntibyakunda dore ko uwagombaga kumusimbura muri Arsenal Thomas Lemar kuva muri Monaco bitashobotse ko yerekeza I London.

Sanchez w’imyaka 28 y’amavuko amaze gutsindira Arsenal ibitego bitatu, atanga imipira ibiri yavuyemo ibitego mu marushanwa yose amaze gukina muri uyu mwaka w’imikino.

DUSHIMIMANA Aimable/celebzmagazine.com




Leave a Reply

Your email address will not be published. Required fields are marked *