Amayobera :Serubibi yahakanye guhombya Leta, Rwamuganza ashinjwa kwivanga mu mitangire y’isoko

Serubibi Eric wahoze ayoboye Ikigo cy’Igihugu gishinzwe Imyubakire (RHA) yavuze ko ibyaha ashinjwa byo guhombya Leta no kuyihendesha mu isoko ryo kugura inzu, atabyemera, ko iryo soko yaritanze mu buryo bwubahirije amategeko ndetse ngo na Minisitiri w’Ubutabera yamwandikiye amubwira ko nta mategeko yirengagijwe.

Serubibi aregwa hamwe na Rwamuganza Caleb wahoze ari Umunyamabanga uhoraho muri Minisiteri y’Imari n‘Igenamigambi, Christian Rwakunda wari Umunyamabanga Uhoraho muri Minisiteri y’Ibikorwa Remezo, Kabera Godfrey wari ushinzwe igenamigambi muri Minisiteri y’Imari n’Igenamigambi na Rusizana Aloys, Umushoramari wagurishije inzu na Leta ari nayo ntandaro y’ibyaha bashinjwa.

Ubushinjacyaha bubarega guhombya leta amafaranga agera kuri miliyari 2 Frw, ubwo hagurwaga inzu yishyuwe 9 850 000 000 Frw nyamara umugenagaciro yari yagaragaje ko ikwiriye kugurwa atarenze 7 600 000 000 Frw.

Kuri uyu wa Kane hakomeje kumvwa ubwiregure bwabo ku byaha bashinjwa, mu bujurire bagejeje ku rukiko rwisumbuye rwa Gasabo, bamagana umwanzuro wo gufungwa iminsi 30 y’agateganyo wafashwe n’urukiko rw’ibanze rwa Gasabo.

Iburanisha ryatangiye saa munani zirengaho iminota mike, nyuma y’uko kuburana mu gitondo bitakunze kuko hari ibyuma by’ikoranabuhanga bitari byakabonetse.

Serubibi niwe wakomeje kwiregura ku byaha ashinjwa birimo gukoresha nabi umutungo wa Leta. Abanyamategeko be bavuze ko nta gukoresha nabi umutungo wa Leta kwabayeho kuko inzu yaguzwe na Leta mu ngengo y’imari yari yateganyijwe, kandi ko hatakoreshejwe arenze ayari yateganyijwe.

Ku cyaha cyo guhendesha Leta, abunganira Serubibi bavuze ko kuba hari inama bagiye bagirana n’umushoramari bagamije kumvikana ku giciro cy’iyo nzu Leta yaguze, bikagera aho bananiranwa ubwo bari bageze kuri miliyari umunani, ari ikigaragaza ko we icyo yashakaga atari uguhendesha Leta.

Bavuze ko mu nzu zose Leta yagiye igura iyo ariyo yaguzwe amafaranga make ku buryo nta guhendesha Leta kwabayeho.

Ku cyaha cyo gutanga isoko binyuranyije n’amategeko, abunganira Serubibi bavuze ko nta tegeko ryirengagijwe ndetse ngo ubwo bajyaga gutanga isoko bitanyuze mu ipiganwa, bandikiye ikigo gishinzwe amasoko ya Leta bakibaza niba nta mategeko yishwe, kibabwira ko ntayo.

Ngo banasabye Minisitiri w’Ubutabera icyo atekereza ku isinywa ry’amasezerano yo kugura iyo nzu hashingiwe ku mategeko, yandika ababwira ko nta kibazo kirimo.

Serubibi Eric yavuze ko Minisitiri w’Ubutabera yabahaye ibyo bagomba gukosora byarangira amasezerano akaba yasinywa nta kibazo.

Yasabye kurekurwa by’agateganyo agasanga umuryango we ndetse atanga ingwate y’inzu ya miliyoni 90 Frw.

Saa 15:10: Ubushinjacyaha bwahawe umwanya buvuga ko kuba Serubibi yaritabiriye ibiganiro byo kumvikana n’umushoramari tariki 18 Gicurasi 2018, yabikoze bitemewe n’amategeko kuko ubusanzwe ibyo biganiro byitabirwa n’abari ku kanama gashinzwe amasoko ndetse n’abashinzwe umutungo mu bigo bya Leta.

Ubushinjacyaha buvuga ko kuba Serubibi yaritabiriye atari mu bemewe n’itegeko, bituma ibyakozwe bitari byubahirije amategeko kandi ngo igiciro cyumvikaniwe muri iyo nama ni nacyo cyaje gukurikizwa ubwo isoko ryatangwaga.

Buvuga ko iyo ifatwa nk’inama itemewe yari igamije akagambane ko guhendesha Leta.

Serubibi yaburanye yibaza impamvu hari izindi nama zabaye muri Werurwe 2018 zitavugwaho, nyamara nazo zari zigamije kumvikana n’umushoramari. Ubushinjacyaha bwavuze ko inama zakozwe icyo gihe iby’igiciro bitari byakagezweho.

Ku kuba uregwa asaba kurekurwa by’agateganyo, ubushinjacyaha bwabiteye utwatsi, buvuga ko ingwate yatanze ari iya miliyoni 75 mu gihe agaciro k’ibyo baregwa guhombya eta kangana na 1.804 278 800 Frw.

Yavuze ko nibura yakabaye arekurwa atanze inshuro ebyiri z’ayo bashinjwa kunyereza. Gusa bwavuze ko ibyiza ari uko bakomeza gufungwa kugira ngo iperereza rikorwe mu bwisanzure.

Rwamuganza ntiyumva uko inama yayoboye yiswe iyo guhendesha Leta hari n’izatanzwemo menshi mbere
Caleb Rwamuganza yahawe umwanya ngo yisobanure, umwunganizi we mu mategeko Me Nkundabarashi Moise avuga ko ibyaha umukiliya we ashinjwa gukora, byabaye muri Gicurasi 2018, nyamara ubushinjacyaha ngo bwamureze bushingiye ku itegeko ryasohotse nyuma y’amezi ane icyo ashinjwa gikozwe.

Ku gukoresha nabi umutungo ufitiye rubanda akamaro, yavuze ko umukiliya we atigeze abikora kuko bahereye ku byo umugenagaciro sosiyete ya Gasabo 3D yakoze, kandi ubushinjacyaha bukaba buyemera, bakongeraho igereranya n’andi mazu Leta yagiye igura mbere.

Yavuze kandi ko atumva uburyo ubushinjacyaha bufata ibintu byakozwe muri Gicurasi 2018 isoko ritaratangwa, bukabihuza n’ibyabaye mu Ukwakira 2018 isoko riri gutangwa kandi icyo gihe Rwamuganza atari akiri mu batanga isoko.

Nkundabarashi yasabye ko ubushinjacyaha butafata ibintu muri rusange, aho kugaragaza icyaha cya buri umwe n’uko agiye agikora.

Rwamuganza yatanze ingwate ya miliyoni 40 Frw ariko ubushinjacyaha burayanga. Me Nkundabarashi yavuze ko atumva uburyo ubushinjacyaha bwanga ingwate, buvuga ko itangana n’ayo Leta yahombye mu gihe abaregwa batemera raporo yakozwe n’ubugenzacyaha igaragaza igihombo Leta yagize.

Nkundabarashi yavuze ko iyo raporo batayizi kandi bagerageje kuyisaba ntibayihabwa, bagasaba urukiko kutayishingiraho.

Yanavuze ko ubushinjacyaha butakabaye busaba abaregwa ingwate zikubye kabiri igihombo buvuga ko Leta yagize, mu gihe buterekana inkomoko n’ishingiro ry’iyo raporo yagaragaje igihombo. Yanavuze ko uteranyije ingwate z’abaregwa, zifite agaciro gasaga igihombo ubushinjacyaha buvuga, bityo ko bakabaye barekurwa.

Caleb Rwamuganza yiregura, we yavuze ko nta kuntu yashinjwa guhendesha Leta kandi yerekana izindi nzu Leta yagiye igura ku giciro kiri hejuru y’iyo baguze ku Kacyiru.

Ubushinjacyaha bwatanze urugero rw’indi nzu Leta yaguze ku Kacyiru ikagurwa amafaranga make, Rwamuganza avuga ko iyo ubushinjacyaha buvuga ishaje kuko imaze imyaka 36 ku buryo utayigereranya n’inzu yo mu 2018.

Raporo y’igenagaciro yakozwe na Gasabo 3D ikerekana ko inzu ifite agaciro ka miliyari umunani, Rwamuganza yavuze ko itahabwa agaciro kuko yakozwe inzu itaruzura. Ngo imaze kuzura ba nyirayo bakoresheje igenagaciro basanga ifite agaciro ka miliyari 11.

Kuba hari ibiciro byemejwe mu biganiro byabaye muri Gicurasi 2018 birimo na Rwamuganza, akaba aribyo bigenderwaho mu isoko ryatanzwe na RHA mu Ukwakira uwo mwaka, Rwamuganza avuga ko nta kibazo biteye kuko akanama gashinzwe amasoko kari gafite ububasha bwo kubyemera cyangwa ntibyemerwe.

Ikindi ngo nuko mu biganiro bagiye bagirana n’umushoramari mbere y’isoko, abatekinisiye ba RHA babaga barimo babagira inama, kubw’ibyo ngo bari babizi neza ko Leta itazahendwa.

Rwamuganza kandi yavuze ko atumva uburyo hari inama yabaye muri Werurwe 2018, Leta yemeye kwishyura miliyari 12 itavugwaho n’ubushinjacyaha nyamara iyabaye muri Gicurasi bishyura miliyari 9 ikaba ariyo barebaho.

Ati “Byaba bibabaje ubushinjacyaha buvuze ngo inama ya mbere barayemeye, aho hatangagwa miliyari 12, aho twatanze make bibaye ikibazo.”

Rwamuganza ngo yivanze mu mitangire y’isoko

Ubushinjacyaha buhawe ijambo ngo buvuge kubyo Rwamuganza yari amaze kwireguraho, bwavuze ko nta gushidikanya Rwamuganza yagize uruhare mu kwivanga mu itangwa ry’isoko ryatumye Leta ihendwa.

Bwavuze ko ubusanzwe RHA ariyo yagombaga gutanga isoko, nyamara ngo Rwamuganza wari Umunyamabanga Uhoraho muri Minecofin niwe wateguye inyandiko y’amasezerano yasinywe bagiye gutanga iryo soko, mu gihe RHA ariyo yagombaga kuyitegura.

Ngo nyuma yo gutegura iyo nyandiko, yohererejwe Christian Rwakunda wari Umunyamabanga Uhoraho muri Mininfra, nawe ayoherereza Serubibi wayoboraga RHA.

Ibyo ngo bigaragaza uburyo Rwamuganza yakomeje kwivanga mu mitangire y’iryo soko. Ubushinjacyaha buvuga ko kuba ari we wayoboye ibiganiro bitemewe byafatiwemo igiciro, nyuma akagaragara no mu mitangire y’isoko atabyemerewe ari ikigaragaza kwivanga.

Mu nyandikomvugo yo mu bugenzacyaha, ngo Serubibi yavuze ko bamusabye ko ku giciro cyemeranyije muri Gicurasi nta kigomba guhinduka, ibyo ngo bikemeza uburyo bakomeje kwivanga kugira ngo isoko ritangwe ku mafaranga bashaka.

Munyabugingo Bunaventure ni undi mu baregwa wakoze igenegaciro ryatumye hishyurwa asaga miliyari icyenda ku nzu Leta yaguze wahawe umwanya ngo yiregure.

Ashinjwa kuba icyitso cy’abandi baregwa, akaba akekwaho kuba yarakoranye nabo mu gutanga igenagaciro ritari ryo.

Ubushinjacyaha buvuga ko yagiye ahura na RHA bakagirana ibiganiro, bifatwa nk’ibyasembuye gukora igenagaciro rihuye n’ibyo bashaka.

Munyabugingo yabihakanye, avuga ko guhura na RHA byabaga biri mu bijyanye n’akazi yahawe ko gukora igenagaciro.

Yavuze ko nta na hamwe ubushinjacyaha buvuga ko yarenze ku mahame y’umwuga. Kuba igenagaciro rye ridahura n’iryakozwe mbere, ngo ntabwo byapfa kubaho ko abagenagaciro babiri bahuriza ku mubare umwe.

Yavuze ko ubushinjacyaha bugendera kuri raporo yakozwe na Gasabo 3D inzu itaruzura, we mu gihe yarikoze inzu yuzuye.Yasabye kurekurwa kuko ngo ibyo ashinjwa nta shingiro bifite.

Umucamanza wari uyoboye iburanisha amaze kumva impande zombi, yapfundikiye urubanza, atangaza ko ruzasomwa tariki 14 Nyakanga saa munani z’amanywa.

Kabera Godfrey wari ushinzwe igenamigambi muri Minisiteri y’imari n’igenamigambi ,Eric wahoze ari Umuyobozi w’Ikigo cya Leta gishinzwe imyubakire (RHA), ndetse na Rusizana Aloys bose bashinjwa guhombya Leta saga miliyari ebyiri.

Saa 15:30: Rwamuganza Caleb ari kwiregura




Leave a Reply

Your email address will not be published. Required fields are marked *